തൃശൂര്‍: തൃശൂരിന്റെ പെരുമ പൂരം പോലെ ലോകത്ത് എല്ലായിടത്തും എത്തിച്ച പുലികളി സംഘങ്ങള്‍ക്ക് കേന്ദ്രമന്ത്രിയും തൃശൂരിന്റെ എംപിയുമായ സുരേഷ് ഗോപിയുടെ ഓണസമ്മാനം. ഓരോ സംഘത്തിനും കേന്ദ്രസഹായമായി മൂന്നു ലക്ഷം രൂപ വീതം നല്‍കുമെന്ന് സുരേഷ് ഗോപി തന്റെ ഫേസ്ബുക്ക് പേജിലൂടെയാണ് അറിയിച്ചത്.
ചരിത്രത്തില്‍ ആദ്യമായാണ് കേന്ദ്ര ടൂറിസം മന്ത്രാലയം പുലികളിസംഘങ്ങള്‍ക്ക് സഹായധനം അനുവദിക്കുന്നതെന്നും സുരേഷ് ഗോപി വ്യക്തമാക്കുന്നു. മന്ത്രാലയത്തിന്റെ ഡോമസ്റ്റിക് പ്രൊമോഷന്‍ ആന്‍ഡ് പബ്ലിസിറ്റി ഇന്‍ക്ലുഡിങ് ഹോസ്പിറ്റാലിറ്റി എന്ന പദ്ധതിയുടെ കീഴിലാണ് ഈ ധനസഹായം. ഇത് സാധ്യമാക്കുന്നതില്‍ എല്ലാ സഹായവും ചെയ്ത കേന്ദ്ര ടൂറിസം സാംസ്കാരിക വകുപ്പ് മന്ത്രി ഗജേന്ദ്ര സിങ് ഷെഖാവത്തിനും സുരേഷ് ഗോപി തന്റെ പോസ്റ്റില്‍ നന്ദി അറിയിക്കുന്നുണ്ട്.
പോസ്റ്റിന്റെ പൂര്‍ണരൂപം
പ്രശസ്തമായ തൃശ്ശൂർ പുലിക്കളി സംഘങ്ങൾക്ക് എന്റെ ഓണസമ്മാനം 
ചരിത്രത്തില്‍ ആദ്യമായി കേന്ദ്ര ടൂറിസം മന്ത്രാലയം പ്രശസ്തമായ തൃശ്ശൂർ പുലിക്കളി സംഘങ്ങൾക്ക് 3 ലക്ഷം രൂപ വീതം DPPH സ്കീമിന്റെ അടിയില്‍ അനുവദിക്കുമെന്ന് അറിയിക്കുന്നതിൽ എനിക്ക് അതിയായ സന്തോഷമുണ്ട്!
ഇത് സാധ്യമാക്കുന്നതിൽ എല്ലാവിധ സഹായവും നല്‍കിയ കേന്ദ്ര ടൂറിസം- സാംസ്കാരിക വകുപ്പ് മന്ത്രി ശ്രീ Gajendra Singh Shekhawat ജിക്ക് ഹൃദയം നിറഞ്ഞ നന്ദി.
കൂടാതെ, സൗത്ത് സോൺ കൾച്ചറൽ സെന്റർ,(Thanjavur ) പുലിക്കളി സംഘങ്ങൾക്ക് 1 ലക്ഷം രൂപ വീതം സംഭാവന ചെയ്യും.
Let’s keep the THRISSUR Spirit alive! 
