ന്യൂയോര്ക്ക്: പ്രഥമ ഇ-മലയാളി സാഹിത്യ പുരസ്കാരം പ്രശസ്ത മലയാളി എഴുത്തുകാരന് മേതില് രാധാകൃഷ്ണന്. ശാസ്ത്രത്തെ സാഹിത്യത്തോട് അടുപ്പിച്ച ലേഖനങ്ങളും ആര്ട്ടിഫിഷ്യല് ഇന്റലിജന്സ് മുഖ്യ പ്രമേയമായി 1999ല് പ്രസിദ്ധീകരിച്ച ദൈവം, മനുഷ്യന്, യന്ത്രം എന്ന കൃതിയും മുന്നിര്ത്തിയാണ് അവാര്ഡ് സമ്മാനിക്കുന്നത്. കവി, കഥാകൃത്ത്, നോവലിസ്റ്റ് എന്നീ നിലകളില് മലയാള സാഹിത്യത്തിനു പുതിയ ഭാവുകത്വം നല്കിയ എഴുത്തുകാരനാണ് മേതില്. ഒരു ലക്ഷം രൂപയും ഫലകവും പ്രശസ്തിപത്രവുമാണ് അവാര്ഡ്. പുരസ്കാര തുക ചിന്തകനും എഴുത്തുകാരനുമായ കെ വേണു മേതിലിനു സമ്മാനിക്കും. ഫലകം സാഹിത്യ അക്കാദമി ചെയര്മാന് കെ സച്ചിദാനന്ദന് കൈമാറും. തൃശൂരില് ഒക്ടോബര് 19നാണ് പുരസ്കാര വിതരണം. ന്യൂയോര്ക്കില് നിന്നുള്ള മലയാളം പ്രസിദ്ധീകരണമാണ് ഇ-മലയാളി ഡോട്കോമും മാസികയും.
ശാസ്ത്രത്തെ ജനപ്രിയമാക്കിയ മേതില് രാധാകൃഷ്ണന് ഇ-മലയാളി പുരസ്കാരം
