കൊച്ചി: അര്‍ജന്റീനയും ലയണല്‍ മെസിയും കേരളത്തിലേക്ക് നവംബറില്‍ പോയിട്ട് അടുത്തെങ്ങും വരില്ലെന്ന് ഉറപ്പാണെങ്കിലും കലൂര്‍ അന്താരാഷ്ട്ര സ്റ്റേഡിയത്തിന്റെ നവീകരണവുമായി വിശാലകൊച്ചി വികസന അഥോറിറ്റി മുന്നോട്ട്. മെസിയുടെ വരവിനു വേണ്ടി തയാറെടുക്കാനാണ് ലോകോത്തര നിലവാരത്തിലുള്ള ടര്‍ഫ് നിര്‍മാണം സ്റ്റേഡിയത്തില് ആരംഭിക്കുന്നത്. പണി മുന്നോട്ടു പോകുന്നതിനിടെയാണ് മെസിയും കൂട്ടരും വരില്ലെന്ന വിവരം പുറത്താകുന്നത്. എങ്കിലും പണികള്‍ മുടക്കം കൂടാതെ പുരോഗമിക്കുകയാണിപ്പോഴും.
നവംബര്‍ പതിനേഴിന് അര്‍ജന്റീനയും ഓസ്‌ട്രേലിയയും തമ്മിലുള്ള സൗഹൃദമത്സരം കലൂര്‍ സ്റ്റേഡിയത്തില് നടക്കുമെന്നായിരുന്ന പഴയ അറിയിപ്പ്. അതിനു മുമ്പ് സ്റ്റേഡിയം നവീകരിക്കുന്നതിനു വേണ്ടി സെപ്റ്റംബര്‍ 24നാണ് പണികള്‍ തുടങ്ങുന്നത്. രാവിലെയും വൈകുന്നേരവുമായി ഓവര്‍ ടൈമില്‍ കൂടി ജോലി ചെയ്താണ് 27 തൊഴിലാളികള്‍ സ്റ്റേഡിയത്തിന്റെ നവീകരണം പൂര്‍ത്തിയാക്കുന്നത്.
ജിസിഡിഎ ഇതുസംബന്ധിച്ച് ഫേസ്ബുക്കില്‍ പങ്കുവച്ച പോസ്റ്റിന്റെ പൂര്‍ണ രൂപം
മെസ്സി ഉള്‍പ്പെടുന്ന അര്‍ജന്റീന ടീം സൗഹൃദമത്സരം കളിക്കാനായി നവംബര്‍ മാസത്തില്‍ കേരളത്തിലേക്ക് വരുന്നു എന്ന പ്രഖ്യാപനം വന്നതിനു ശേഷം ‘സമയ’മാണ് പ്രധാന വില്ലനായി പ്രതിരോധം തീര്‍ത്തത്. കേരളത്തില്‍ ഫിഫ നിലവാരത്തിലുള്ള അന്താരാഷ്ട്ര മത്സരം കളിക്കുന്നതിന് പര്യാപ്തമായ സ്റ്റേഡിയവും സൗകര്യങ്ങളും കൊച്ചിയിലാണെന്ന് വിലയിരുത്തിയ ശേഷം ചുരുങ്ങിയ സമയത്തിനുള്ളില്‍ ധാരാളം ജോലികള്‍ നിര്‍വഹിച്ചു കൊണ്ട് സ്റ്റേഡിയത്തിന് ഫിഫ സര്‍ട്ടിഫിക്കേഷന്‍ നേടിയെടുക്കുന്നതിനുള്ള പ്രവര്‍ത്തനങ്ങള്‍ ആരംഭിച്ചു. കവാടം ഒരുക്കല്‍, പാര്‍ക്കിംഗ് ഏരിയ സജ്ജീകരണം, ബൗണ്ടറി വാള്‍ നിര്‍മ്മാണം, സീറ്റിങ്, സ്ട്രക്ചറല്‍ റിപ്പയര്‍ തുടങ്ങി ടര്‍ഫ് അന്താരാഷ്ട്ര നിലവാരത്തിലാക്കുന്നത് വരെയുള്ള പ്രവൃത്തികള്‍ ഉള്‍പ്പെടുന്നു.
നവംബര്‍ 17 ന് മത്സരം നടക്കും എന്ന വിലയിരുത്തലോടെ സെപ്റ്റംബര്‍ 24 നാണ് ടര്‍ഫ് ലോകനിലവാരത്തിലാക്കുന്നതിനുള്ള ജോലികള്‍ ആരംഭിച്ചത്. നവംബര്‍ 10 ന് ടര്‍ഫ് ഫിഫ സ്റ്റാന്‍ഡേര്‍ഡിലേക്ക് സജ്ജമാക്കുന്നതിനായി 45 ദിവസങ്ങളാണ് മുന്നിലുണ്ടായിരുന്നത്. ഇന്ന് 34 ദിവസങ്ങള്‍ പിന്നിടുമ്പോള്‍ ടര്‍ഫിന്റെ മാറ്റം പ്രകടമാണ്. 27 തൊഴിലാളികള്‍ രാവിലെയും വൈകീട്ടും ഓവര്‍ ടൈം ജോലി ചെയ്തത് കൊണ്ടാണ് ഇത്രയും ചുരുങ്ങിയ സമയം കൊണ്ട് ഗുണനിലവാരത്തോടെ ടര്‍ഫിന്റെ മാറ്റം സാധ്യമായത്. 10 ദിവസം കൂടി കഴിഞ്ഞാല്‍ ടര്‍ഫ് അന്താരാഷ്ട്ര നിലവാരത്തില്‍ പൂര്‍ണ്ണ സജ്ജമാകും.
ടര്‍ഫ് മെയിന്റനന്‍സ് വളരെ ചിലവേറിയ പ്രവൃത്തിയായതിനാല്‍ സീസണ്‍ ആരംഭിക്കുന്നതിന് മുന്‍പ് മാത്രമാണ് ബ്ലാസ്റ്റേഴ്സ് ടര്‍ഫ് സജ്ജീകരണം നിര്‍വഹിക്കാറുള്ളത്. മാര്‍ച്ചില്‍ ഐഎസ്എല്‍ മത്സരങ്ങള്‍ കഴിഞ്ഞതിനു ശേഷം ഏകദേശം 6 മാസങ്ങള്‍ക്കപ്പുറമാണ് മെസ്സിയുടെ മത്സരത്തിനായി ടര്‍ഫ് സജ്ജമാക്കുന്നതിനുള്ള പ്രവൃത്തികള്‍ ആരംഭിക്കുന്നത്. ഫിഫ സ്റ്റാന്‍ഡേര്‍ഡില്‍ ടര്‍ഫ് സജ്ജീകരിക്കുന്നതിനും മെയിന്റനന്‍സ് ചെയ്യുന്നതിനും ചിലവ് പതിര്‍മടങ്ങാണ്. അന്താരാഷ്ട്ര നിലവാരത്തിലേക്ക് ടര്‍ഫ് സജ്ജമാക്കുന്നതിനായി ധാരാളം വെല്ലുവിളികള്‍ ഉണ്ടായിരുന്നെന്ന് ടര്‍ഫ് കോണ്‍ട്രാക്ടര്‍ രാഹുല്‍ പരാശര്‍ പറയുന്നു. ചുരുങ്ങിയ സമയത്തിനുള്ളില്‍ ധാരാളം ജോലികള്‍ ചെയ്യേണ്ടതായി വന്നു. ടര്‍ഫില്‍ നിലവിലുണ്ടായിരുന്ന ഗ്രാസ് ലെയര്‍ നീക്കം ചെയ്ത് ഡ്രൈ ഗ്രാസ് പൂര്‍ണ്ണമായും നീക്കം ചെയ്യുന്നതിന് മാത്രമായി മുഴുവന്‍ തൊഴിലാളികളും 4 ദിവസത്തോളം പൂര്‍ണ്ണമായും ജോലി ചെയ്യേണ്ടതായി വന്നു. ടര്‍ഫിലുണ്ടായിരുന്ന ധാരാളം മണ്ണിരകളെയും കീടനാശിനി പ്രയോഗിച്ച് നീക്കം ചെയ്തു. ശേഷം മുംബൈയില്‍ നിന്ന് പ്രത്യേകം എത്തിച്ച വിലയേറിയതും ഗുണനിലവാരത്തിലുള്ളതുമായ പിങ്ക് സാന്‍ഡ് ടോപ്പ് ഉപയോഗിച്ചാണ് ടര്‍ഫിനായി സജ്ജമാക്കിയത്. ഫീല്‍ഡ് ഓഫ് പ്ലെയിലും ഡഗ് ഔട്ട് ഏരിയയിലും പുതിയ ഗ്രാസ് നിരത്തി സജ്ജമാക്കി ആദ്യ ലെയര്‍ വെട്ടി ശരിയാക്കി. ബര്‍മുഡ ഗ്രാസ് ആണ് ഉപയോഗിച്ചിട്ടുള്ളത്. ശേഷം ഇടതൂര്‍ന്ന ഭാഗങ്ങളിലെല്ലാം വീണ്ടും ഗ്രാസ് വളര്‍ത്തി സജ്ജമാക്കി. ഉയര്‍ച്ചതാഴ്ച്ചകള്‍ ഒഴിവാക്കി ലെവല്‍ കൃത്യമാക്കുന്നതിനുള്ള പ്രവൃത്തികളും ചെയ്തു. ഇനിയുള്ള 10 ദിവസങ്ങളിലായി ചെയ്യുന്ന പാറ്റേണ്‍ കട്ടിങ്ങും ലൈന്‍ മാര്‍ക്കിങ്ങും കൂടി കഴിഞ്ഞാല്‍ മികച്ച ഗുണനിലവാരത്തോടു കൂടി ഫിഫ സ്റ്റാന്‍ഡേര്‍ഡില്‍ അന്താരാഷ്ട്ര ടര്‍ഫ് പൂര്‍ണ്ണമായി സജ്ജമാകും. 34 ദിവസങ്ങളിലായി 27 ഓളം തൊഴിലാളികളുടെ കഠിനപ്രയത്‌നത്തിലൂടെയാണ് ടര്‍ഫ് ഫിഫ സ്റ്റാന്‍ഡേര്‍ഡില്‍ സജ്ജമാക്കിയത്. ഈ ചുരുങ്ങിയ സമയത്തിനുള്ളിലുള്ള പ്രവര്‍ത്തനങ്ങളില്‍ മഴയും പ്രതിസന്ധികള്‍ സൃഷ്ടിച്ചു.
ദിവസങ്ങള്‍ക്കിപ്പുറം മികച്ച ഗുണനിലവാരത്തോടെയുള്ള അന്താരാഷ്ട്ര ടര്‍ഫ് ഒരുങ്ങുന്നതായി ചിത്രങ്ങളില്‍ കാണാനാകും. കൂടുതല്‍ അന്താരാഷ്ട്ര മത്സരങ്ങള്‍ നമ്മുടെ കൊച്ചിയിലേക്ക് എത്തട്ടെ. നമ്മുടെ നാടിനെ ലോകമറിയട്ടെ…
