ന്യൂഡല്‍ഹി: വിദ്യാഭ്യാസ സ്ഥാപനങ്ങള്‍, ബസ് സ്റ്റാന്‍ഡുകള്‍, റെയില്‍വേ സ്റ്റേഷനുകള്‍ തുടങ്ങിയ പൊതു ഇടങ്ങളില്‍ നിന്നു തെരുവുനായ്ക്കളെ ഒന്നൊഴിയാതെ നീക്കം ചെയ്യണമെന്ന് ഉത്തരവിട്ട് സുപ്രീം കോടതി. നായ്ക്കളെ ഇത്തരം സ്ഥലങ്ങളില്‍ നിന്ന് പ്രത്യേക സംരക്ഷണ കേന്ദ്രങ്ങളിലേക്കാണ് മാറ്റേണ്ടത്. ജസ്റ്റിസുമാരായ വിക്രം നാഥ്, സന്ദീപ് മേത്ത, എന്‍ വി അഞ്ജരിയ എന്നിവരടങ്ങിയ ബഞ്ചിന്റേതാണ് ഈ സുപ്രധാന ഉത്തരവ്.
എല്ലാ സംസ്ഥാനങ്ങളോടും കേന്ദ്ര ഭരണ പ്രദേശങ്ങളോടും അവരുടെ അധികാര പരിധിയിലുള്ള പൊതു, സ്വകാര്യ വിദ്യാഭ്യാസ സ്ഥാപനങ്ങള്‍, കായിക കേന്ദ്രങ്ങള്‍ എന്നിവയെല്ലാം നിരീക്ഷിച്ച് തെരുവുനായ്ക്കളെ അവിടെ നിന്നു മാറ്റണമെന്നാണ് ഉത്തരവില്‍ പറയുന്നത്. തെരുവുനായ്ക്കള്‍ പ്രവേശിക്കുന്നതു തടയാന്‍ വിദ്യാഭ്യാസ സ്ഥാപനങ്ങള്‍, ആശുപത്രികള്‍, സര്‍ക്കാര്‍ സ്ഥാപനങ്ങള്‍ തുടങ്ങിയ പൊതു ഇടങ്ങളില്‍ ശരിയായ മതിലോ വേലിയോ നിര്‍മിച്ചിട്ടുണ്ടെന്ന് ഉറപ്പാക്കണമെന്ന് ജില്ലാ മജിസ്‌ട്രേറ്റുമാരോട് കോടതി ആവശ്യപ്പെട്ടു. ഈ സ്ഥലങ്ങളില്‍ തെരുവു നായ്ക്കള്‍ ഇല്ലെന്ന് ഉറപ്പാക്കാന്‍ പതിവായി സന്ദര്‍ശനം നടത്തണമെന്നും ആവശ്യപ്പെട്ടിട്ടുണ്ട്. പിടികൂടിയ തെരുവുനായ്ക്കളെ അതേ സ്ഥലത്തു തന്നെ തിരികെ വിടുന്നില്ലെന്ന് ഉറപ്പാക്കണമെന്നും നിര്‍ദേശങ്ങളിലുണ്ട്.
